LAOAG CITY – Agtultuloy panangisayangkat dagiti disaster response ti Philippine National Police (PNP) ken Armed Forces of the Philippines (AFP) kadagiti rehion a naapektaran ti Southwest Monsoon wenno habagat.
Dagiti kameng ti Philipinne National Police ket nai-deploy tapno tumulong kadagiti residente nga adda iti evacuation centers, vital installations, iti search, rescue and response operations ken iti monitoring ken road clearing operations.
Malaksid iti daytoy, alalayanda pay dagiti na-stranded a commuter iti babaen ti Libreng Sakay-da.
Ti met Armed Forces of the Philippines, naiwaras dagiti disaster response personnel, lugan ken dagiti Humanitarian Assistance and Disaster Relief (HADR) assets kadagiti naapektaran a rehion kas ti Tarlac, Pampanga ken Bataan.
Pakairaman kadagiti insayangkatda nga operasion ket ti relief and rescue operations, panangpatulod ti suplay kas dagiti food packs kadagiti naapektaran a residente.
Kabayatanna, agtultuloy ti pannakikoordinar ti Philippine National Police ken Armed Forces of the Philippines kadagiti lokal a gobierno ken dagiti disaster response agencies para iti alisto a panag-aksion ken tulong kadagiti naapektaran a lugar iti pagilian.
