Kalikagum ti Ilocos Norte Police Provincial Office (INPPO) ti naiget a panagbantay kadagiti indibidual nga agaramat ti PVC type a boga iti probinsia.
Segun ken ni PMaj. Antonio Marzan Jr., ti pannakangiwat ti Ilocos Norte Police Provincial Office (INPPO), addo dagiti umili a manamnama nga agaramat manen ti boga kabayatan nga umas-asideg ti pannakaselebrar ti paskua ken baro a tawen, partikular kadagiti ubbing ken agtutubo.
Gapu iti daytoy, paigetan da ti panagbantay da iti aglawlaw tapno maliklikan dagiti dadduma nga umili ti agusar ti boga.
Innayon na a malaksid iti boga ket naiget pay ti panagbantay da kadagiti iligal wenno dagiti maipawil a paputok a mabalin a mangitunda ti uram wenno aksidente.
Nupay kasta, mangnamnama ti P/Maj Marzan nga awan wenno nababa ti bilang dagiti kaso ti panagaramat ti boga ken dagiti maipawil a paputok kabayatan ti selebrasion ti paskua ken baro a tawen.
Kabayatanna, inbatad na a nabayagen a maipawil ti panagusar ti boga ken dagiti illegal a paputok.
Gapu iti daytoy, nagpalagip kadagiti umili a liklikan ti agusar kadagitoy tapno napinpintas ken naragragsak ti panangselebrar ti paskua ken baro a tawen.












