LAOAG CITY – Agtultuloy ti pannakaisayangkat ti imbestigasion ti kameng ti Philippine National Police iti ili ti Sarrat gapu iti pannakaidiskubre kadagiti tultulang iti uneg ti maysa a simbaan iti ili ti Sarrat.
Segun ken ni P/Capt. Ashley Cacayorin, Chief of Police ti Sarrat Municipal Police Station, personal a nagturong dagiti foreman iti stasion iti pulisya tapnu i-report dagiti nakalida a tultulang manipud iti uneg ti Sta. Monica Church.
Kunana a naikali dagiti nasao a tultulang manipud iti pagserrekan agingga iti pagruaran iti uneg ti simbaan nga addaan daytoy ti kauneg a sangapulo a kadapan.
Nupay kasta, inbatadna nga iti agdama, naikabilen dagiti narekobre a tultulang iti maysa a pribado a puneraria para iti pannakaipreserbarna.
Mainaig iti daytoy, impakaammo ni Cacayorin nga addan dagiti pannakikoordinarda kadagiti otoridad, pakairamanan ti Ilocos Norte Provincial Forensic Unit para iti naan-aay a dokumentasion ken panang-eksaminar kadagiti narekobre a tultulang.
Kabayatanna, innayon pay ni Cacayorin a mapatta-patta a nasuroken a 300 a tawenen ti simbaan a Sta. Monica Church a nakakalian dagiti narekobre a tultulang.
