LAOAG CITY – Naisayangkat ti Lighting ceremony kagiddan ti pannakaselebrar ti panagkasangay ni dati a presidente Ferdinand Marcos Sr. kadagiti dua a sitio ti dua a barangay manipud iti ili ti Dingras ken Sarrat nga indauloan ni Ilocos Norte Electric Cooperative General Manager Perry Martinez.
Daytoy ket gapu ta ti dati a presidente ket mabigbig kas ama ti Rural Electrification.
Mainaig iti daytoy, 60 a pagtaengan ti nabenepisiaran ti libre a pannakasilaw iti ili ti Dingras ken 35 met iti ili ti Sarrat.
Gapu iti daytoy, napalaus ti panagyaman dagiti Local chief executive dagiti nasao nga ili.
Segun ken ni Mayor Joemel Go-Sy, dakkel a tulong daytoy a programa ti INEC iti komunidad gapu ta daytoy ket mangted ti praktikal a pagnam-ayan ken panangipaay ti seguridad iti publiko.
Kabayatanna, kinomendaran met ni Mayor Ralph Medrano iti ili ti Sarrat ni INEC General Manager Martinez gaputa dagiti initiatibona a mangted namnama kadagiti amin a pamilya gapu ta adadda pay nga agbalin a progresibo dagiti naruay a lugar iti ili ti Sarrat.
Kinunana a saanen a kasapulan dagiti naruay a pamilya a mapan agsapol ti pagisaksakanda gapu ta adda bukoddan a koneksion iti kuryente.
Kabayatanna, inbatad ni General Manager Perry Martinez, a daytoy a programa ti Ilocos Norte Electric Cooperative ket panangitultuloy laeng iti narugyanan ti ama ti rural electrification a ni dati a Presidente Ferdiannd Marcos Sr. ken mangnamnama daytoy a babaen ti in-inot a pannakaipaay ti libre a pannaka-ikonektar ti kuryente kadagiti lugar nga awanan pay ket agballigida iti kalikagumda a 100% electrified ti probinsia ti Ilocos Norte.
