LAOAG CITY – Indaulwan ni Presidente Ferdinand Marcos Jr. ti Wreath laying ceremony iti ciudad ti Batac iti maika-109 a kasangay daydi dati Presidente Ferdinand Marcos Sr.
Nagatendar pay iti nasao nga aktibidad dagiti opisyales ditoy probinsya ken adda pay dagiti sumagmamano nga opisyal ti gobierno national, pakairamanan ni House Speaker Bojie Dy III.
Iti panagbitla ni Presidente Marcos Jr., inbatad na nga ado dagiti insuro kenkuana ti ama na maipanggep iti panagserbi iti publiko.
Kuna na a ti saanna pulos a malipatan a balakad kenkuana ti amana ket ti saan a mangpili iti alisto a pagruwaran wenno pangliklikan iti aniaman a pannubok no di ket masapol nga aramiden ti umiso nga addang uray kasanu ti kinarigatna.
Innayon na ti kapatgan a nasursuro na manipod iti dati a presidente ket masapol a ti panagserbi iti publiko ket maipanggep iti pagilian ken dagiti Pilipino.
Saan met a nakalisi iti imatang dagiti tattao ti “kulitan moments” da Congressman Sandro Marcos ken ni 1st Lady Liza Araneta Marcos kabayatan ti panangkanta da ti ilukano versio ti “Birthday Song”.
Kabayatanna, naruay a tulong ti naipaay para kadagiti umili ditoy probinsya manipod iti opisina ni Ilocos Norte 1st District Representative Sandro Marcos.
Daytoy ti inbatad ni Congressman Marcos iti interview kenkuana kabayatan ti selebrasyon ti maika-109 a kasangay daydi lolo na a ni dati a Presidente Ferdinand Marcos Sr.
Inlawlawag na a ti panangipaay da kadagiti tulong ket isu ti maysa a wagas iti panangbigbig da iti pimmusay a dati a presidente.
