Kinarit ni Senator-judge Robin Padilla ti prosekusyon nga imbestigaren met ti panagbiag dagiti agpanpanday linteg iti kamara de representantes, partikular dagiti maipagarop nga agtagikua kadagiti agkakangina a lugan nga agbalor ti P16 milyon agingga iti P22 milyon.
Inaramid daytoy ni Padilla kalpasan a trinatar ti prosekusyon ti pananggatang ni Atty. Manases “Mans” Carpio, asawa ni Vice President Sara Duterte, kadagiti sapatos nga agbalor ti P256,882 idiay Malaysia.
Nagbalin a paset daytoy ti panagsaludsud iti isyu ti simple a panagbiag a namnamaen kadagiti opisyal ti gobierno, kas maiyataday iti Konstitusyon.
Kwinestyunaran met ni Padilla no apay a nakatutuk iti pananggatang ti sapatos idinto nga adda met dagiti agpanpanday linteg nga agus-usar kadagiti lugan nga agbalor ti minilyon a pisos.
Inrakurak pay ti senador a nakagastos iti kallabes ti sumuruk-kumurang a P900,000, karaman ti tulong nga inpaay na kadagiti biktima ti pammaltog iti Tacloban ken South Cotabato.
Inpetteng ti senador a masapol nga agbalin a patas ti panangtingiting iti panagbiag ken panaggastos dagiti opisyal ti gobierno, aniaman ti posisyon da.
