LAOAG CITY – Inpangato ti Korte Suprema ti gatad a maawat dagiti biktima ti panagrames ken dadduma pay a krimen tapno adadda a maiyataday daytoy iti kinadagsen ti krimen ken pannakadadael a napasaran ti biktima.

Iti decision ti Supreme Court En Banc iti People v. Flores, naipangato iti P325,000 tunggal maysa manipod P100,000 ti civil indemnity, moral ken exemplary damages iti kaso a qualified rape of a minor.

Mainaig iti daytoy, iti act of lasciviousness, naipangato met iti P175,000 tunggal maysa manipod P50,000.

Basar iti Korte Suprema, kasapolan a mabaliwan ti gatad gapu ti agtultuloy a panagngato ti presio dagiti kangrunaan a magatang iti inaldaw-aldaw.

Kabayatanna, impetteng ti Korte Suprema a mabalin pay a mabaliwan ti bayad depende iti kadagsen ken ti napasamak a krimen.