Nauram ti maysa a garahe iti maysa a pagtaengan iti Brgy. 2 Sta. Joaquina ditoy siudad ti Laoag idi kalman, Nobiembre 13, iti oras ti alas-10:15 iti rabii.
Segun iti Ilocos Norte Police Provincial Office (INPPO), daytoy nga insidente ket insigida a narespondean iti Philippine National Police ditoy siudad ti Laoag, Bureau of Fire Protection ditoy siudad ken ti Department of Public Safety paramedics.
Basar iti inisial nga imbestigasion iti oras ti alas-10:10 iti dayta met laeng a rabii, adda iti uneg ti kuarto dagiti ag-live-in partner a nabigbig a da Ronald Antonio Ancheta, agtawen ti 60, ken ni Vicky Mangaoang Espiritu, agtawen ti 46, nga agpada a residente iti nadakamat a lugar. Idinto a kellaat a naoberbaranda ti uram iti garahe iti pagtaengan da.
Gapu iti daytoy, insigida a nagkiddaw ti tulong ti ag-live-in partner kadagiti karruba da.
Ginandat dagiti ag-live-in partner a salakniban dagiti motorsiklo iti maururam a garahe ket ditoyen a nakapasar ti first-degree burn iti nagduduma a paset ti bagida.
Kalpasan iti daytoy, insigida met a naitaray dagitoy iti Laoag City General Hospital para iti pannakataming da.
Kabayatanna, indeklarar ti maysa a personnel ti Bureau of Fire Protection iti siudad ti Laoag a nangisayangkat ti firefighting operations a nasebseban met laeng ti uram iti oras ti alas-10:30 iti kadayta met laeng a rabii.
Nupay kasta, manarimaan pay laeng ti pannakaduktal ti otoridad ti rason a namunganayan ti uram ken ti pakabuklan a gatad dagiti nadadael.
