LAOAG CITY – Umabot iti 22 a mangisursuro manipud iti 56 ti nadeterminar a primary contacts ni IN-C717, agtawen ti 60 ken residente iti Barangay 52-A, San Mateo ditoy ciudad ti Laoag, ken maysa a mangisursuro iti Shamrock Elementary School.
Segun kenni Mrs. Vilma Eda, ti mangidadaulo ti Schools Division of Laoag, dagiti agibunong kadagiti modules ket sigurado a saan nga infected iti virus gapo ta saan da a nakapulapol ti pasyente.
Inlawlawag na nga uray naka-isolate ti principal iti nadakamat a pagadalan ket makikokoordenar iti City Health Office mainaig iti daytoy ken agtultuloy latta ti pannaka-sort dagiti modules.
Mainaig iti daytoy, posible a mailockdown ti nasao a pagadalan ngem agdependar daytoy iti saritaan ti principal ken ti CHO.
Kabayatanna, kuna ni Eda a mabalin latta nga urayen dagiti nagannak dagiti modules dagiti annak da gapo ta naikoordenar met daytoy kadagiti opisyales ti barangay.
Sungbat daytoy ni Eda kalpasan nga adda ti dimmanon nga impormasyon nga iti laksid ti panagpositibo ti maysa a mangisursuro ket maipagarop a gutgutiguten ti principal dagiti nagannak a mapan ti pagadalan.
Naiyuswat met ti disinfection iti nasao a pagadalan ken manamnama ti pannakaipadalan dagiti close contacts iti swab test.
