LAOAG CITY – Inlungalong ni House Majority Leader ken Ilocos Norte Rep. Sandro Marcos nga aramiden a “criminal offense” ti road rage tapno mapagsungbat ken mapatawan ti nadagsen a pannusa dagiti karaman a kaskasero iti kalsada.
Nakaipalaon daytoy iti House Bill 8190 wenno gakat nga Anti-Road Rage Act nga inlungalong ni Rep. Marcos, kagiddan ti damag mainaig iti road rage iti NLEX no sadinno a maipagarup nga hinarass ken binutbuteng ti maysa kadagiti anak ni Presidente Ferdinand Bongbong Marcos Jr. ti convoy ti gobernador ti Bulacan.
Basar iti gakat ni Marcos, madusa ti 6 a bulan agingga iti 4 a tawen a pannakaibalud wenno multa a P20,000 agingga iti P500,000 ti karaman iti road rage a driver nga agresibo, mangbutbuteng, nagpangta wenno nang-harass ken nangitunda ti risgo iti biag ti maysa a tao ken pannakadadael ti sanikua.
Manaig iti daytoy, dagiti aglabsing ket dumalan iti anger management trainings a tingitingen ti korte nga adda ti pannakikoordinarna iti Metropolitan Manila Development Authority ken Philippine National Police.
Masuspenso pay ti lisensia ti maak-akusaran a driver kabayatan a maim-imbestigaran daytoy ken no mapatawan a guilty ti korte ket tungpal-biag daytoyen a diskualipikado iti panangala ti lisensia.
Inpetteng ni Rep. Marcos, maitayaday ti gakatna iti prinsipio ti pannakaitandudo iti kinatalged ti publiko no sadinno a saan a mabalin a baybay-an nga agtultuloy ti road rage kadagiti kalsada a mangituntunda ti tungpal-biag a trahedia iti biag ti inosente a biktima ken ti pamiliada.
