LAOAG CITY – Inbatad ni Engr. Matthias Malenab iti Second Engineering District ti DPWH a 100 a porsiento a nakumpleto ti Ilocos Norte Electric Cooperative (INEC) ti pannaka-implementar ti agarop 22 a milyon a pisos tapno maiyakar dagiti poste ti kuryente.
Segun kenni Malenab, sabalin to met a pondo ti mausar para iti pannakaiyakar dagiti sumagmamano a poste nga adda pay laeng iti kalsada.
Mainaig iti daytoy, kuna ni Mr. Noel Andres, pannakangiwat ti INEC a dagiti poste a saan a naiayakar ket dagiti adda iti poblacion areas iti nagduduma nga ili.
Kinumpirmaran na a nalpas metten ti pannakaiyakar ti nabatbati nga walo a porsiento kadagiti poste.
Mangnamnama daytoy nga iti kabiitan a panawen ket maawat da ti pondo tapno maiyakaren dagiti poste ti kuryente nga adda kadagiti poblacion areas.
Naamoan a malaksid iti labor para iti pannakaiyakar ti poste ket karaman pay iti 22 a milyon a pisos dagiti nausar a kagamitan para iti pannakasukat dagiti daan a poste.
