LAOAG CITY – Nakanselar ken na-divert ti sumagmamano nga international flights ti kumarkaro a tension iti Middle East.
Basar iti Civil Aviation Authority of the Philippines (CAAP), 23 nga international flights ti nakanselar idinto a tallo ti na-divert gapu iti safety concerns ken airspace restrictions sipod nangrugi ti panangatake ti Estados Unidos ken Israel idiay Iran idi Sabado, Pebrero 28.
Karaman kadagiti nagkanselar ti biahe ti Cebu Pacific (2), Philippine Airlines (8), Qatar Airways (2), Gulf Air (1), Etihad Airways (4) ken Emirates (6) idinto a dua a flight met ti Philippine Airlines ken maysa ti Qatar Airways ti na-divert.
Inbatad ni Civil Aviation Authority of the Philippines Director General Retired Lt. Gen. Raul Del Rosario a mangisaysayangkat ti ahensia ti alisto a tignay kas maiyataday iti pammilin ni Presidente Ferdinand Marcos Jr. ken Transportation Secretary Giovanni Lopez tapno masigurado ti kinatalged dagiti pasahero ken crew.
Nabalakadan dagiti naapektaran a pasahero a makikoordinar iti airline-da para iti rebooking, refund ken updated flight information.
