LAOAG CITY – Umabot iti 24 a tattao ti natay kalpasan a nagreggaay ti sumagmamano a paset ti highway iti kabanbantayan a paset ti probinsya ti Guangdong Province idiay China.
Napasamak daytoy kalpasan ti sumagmamano nga aldaw a panagtudtudo na ti napigsa iti lugar.
Malaksid kadagiti natay ket adda pay ti 30 a sabsabali a naitaray iti ospital kalpasan iti insidente.
Inpasigurado dagiti otoridad a dagiti naitaray iti ospital ket adda dan iti natalged a kasasaad.
Naamoan nga adda ti 20 a behikulo a naregreg iti bimmigay a paset ti kalsada.
Maipalagip a ti Guangdong nga isu ti kaadoan ti populasyon a probinsya iti China ket nagpasar ti flash flood iti napalabas a lawas a nakatayan ti uppat a tattao ken naibakwit dagiti 110 a ribo a sabsabali pay.
