LAOAG CITY – Target ti kompania ti bilyonario a ni Elon Musk nga agbalin a maysa kadagiti launch site ti SpaceX ti Pilipinas, segun ken Presidente Ferdinand Marcos Jr.
Kunana a saan a kalikagum ti pagilian nga maadaan ti bukod na nga space program kas ti NASA wenno mangipatulod ti tao iti bolan wenno Mars, no di ket serken ti negosio ti panangpausar dagiti pasilidad para iti panangiyuswat dagiti rocket.
Inbatad ni Marcos nga adda pagimbagan ti lokasion ti Pilipinas iti lauden a paset ti Pacific Ocean gapu ta no man maadaan ti aberia ti panangiyuswat nga agturong ti daya wenno laud ket agtennag dagitoy iti baybay imbes a dagiti komunidad.
Kinumpirmaran pay ti Presidente a makisarsaritan ti Pilipinas iti SpaceX.
Kunana a ti plano a panangiyuswat ti rocket iti Cagayan ket rugi iti maysa a negosio a posible a makagutigot ti sabali pay a kompania nga agususar dagiti launch site iti pagilian.
Malaksid iti daytoy, makatulong pay daytoy para iti nalaklaka ken naalalisto a mangipatulog dagiti satellite ti Pilipinas.
Segun ken ni Philippine Ambassador to the United States Jose Manuel Romualdez, interisado ni Musk iti Pilipinas ken adaan ti maysa wenno dua nga isla a padpadur-asen na iti pagilian.












