Insigida a nakitaripnong ni Canadian Prime Minister Mark Carney ken ni Presidente Ferdinand Marcos Jr. sumagmamano a minuto kalpasan a simmangpet daytoy iti pagilian.
Nangisayangkat ti dua a lider ti bilateral meeting iti Philippine International Convention Center (PICC) iti Pasay no sadinno karaman kadagiti trinatar ket mainaig iti trade relations wenno negosio iti baet ti dua a pagilian.
Maipalagip a naudi a nagtaripnong ti dua a lider idi Hulio 2026 idi bimmisita ni Presidente Marcos iti Canada.
Karaman kadagiti kangrunaan nga ilunglungalong ti dua a pagilian ket ti Philippine-Canada Free Trade Agreement, maysa kadagiti measure a makitkita a mangpapigsa iti negosio ken pagsapulan.
Iti panagleppas ti taripnong, inanunsio ti dua a lider a pormalen a nagtinnulag ti Pilipinas ken Canada para iti maysa a free trade agreement wenno katulagan iti nawaya a negosio.
Immunan a tinatrar ti dua a pagilian ti panagtinnulong iti paggep ti ekonomia, depensa, seguridad, enerhia, ken relasion dagiti umili wenno people-to-people exchanges.
Malaksid iti bilateral meeting ita nga aldaw, Nobiembre 14, manamnama pay ti agsina a panagsarita ni Prime Minister Carney iti intero nga ASEAN bloc para iti panangilungalong iti free trade agreement iti baet ti Canada ken dagiti miembro ti organisasion.
