Maysa nga Italian Chef ti naikkat iti trabaho iti Brisbane restaurant kalpasan a nagkedked daytoy a mangikabil ti pinya iti pizza gapu ta ibilang na nga insulto daytoy iti kulturana.
Ni Davide Tamburella ket naikkat iti agdama a nakaserra a La Costa restaurant idi Mayo, dua a lawas kalpasan ti taripnong iti management nga addaan ti nakaad-adu a reklamo mainaig iti ugali ti chef.
Maysa kadagiti reklamo ket ti panagkedked ni Tamburella iti panangikabil iti ham ken pineapple pizza para kadagiti bisita iti maysa a function. Iti kadaytoy a panawen, inbatad ti chef a saan a masapol a suroten ti pammilin ti management no ‘offensive’ wenno insulto daytoy iti kultura na.
Mainaig iti daytoy, naibutaktak dagiti detalye kalpasan a nagturong ti chef iti Fair Work Commission ti Australia no sadinno segun kadaytoy ket saan daytoy nainkalintegan a naikkat iti trabaho.
Basar iti ruling, naamoan a ti panagkedked ni Tamburella a mangikabil ti pinya ti pizza ket gapu ta inkonsiderarna nga insulto daytoy iti kulturana, daytoyen ti maikatlo a gundaway a panagkedkedna iti uneg ti 4 a tawen, ken immunan nga inkiddaw na iti employer na a kitaen ti kinapateg para kadagiti Italiano ti saan a panangikabil ti pinya iti pizza.
Kabayatanna, ti state of Queensland, no sadinno nakaipasdekan ti restaurant, ket maikonsiderar a ‘pineapple heartland’ ken mangpro-produce ti amin a commercially-grown a pinya iti Australia.
