LAOAG CITY – Target ti Pilipinas ken Canada a malpas ita a tawen ti negosasion para iti Free Trade Agreement (FTA) tapno mapalawa ti negosio ken panagpuunan iti nagbaetan ti dua a pagilian.
Daytoy ti inrakurak ni Presidente Ferdinand Marcos Jr. kalpasan ti bilateral meeting-na ken ni Canadian Prime Minister Mark Carney iti Vancouver.
Segun iti Presidente, malaksid iti Free Trade Agreement, napagtulaganda a papigsaen ti negosio, siguradoen ti natibker a supply chain ken palawaen ti kooperasion iti ekonomia.
Naammoan a no maipatungpal ti Free Trade Agreement, manamnama nga ad-adda nga alisto ti panagserrek dagiti produkto ken negosio ti Pilipinas ken Canada iti merkado ti tunggal maysa a mabalin a manglukat ti ad-adu nga oportunidad iti negosio ken panagpuunan.
Pormalen a nangrugi ti negosasion para iti bilateral Free Trade Agreement idi 2025 ken target daytoy a malpas ita a tawen.
