Pinirmaanen ti Pilipinas ken Chile ti Comprehensive Economic Partnership Agreement (CEPA) kalpasan ti dua a tawen a negosasion, no sadinno a daytoy ti kaunaan a free trade agreement (FTA) ti pagilian iti maysa a pagilian iti Latin American.

Napirmaan ti katulagan iti bilateral meeting da Presidente Ferdinand Marcos Jr. ken Chilean President Jose Antonio Kast iti Shenzhen idi kalman, Nobiembre 19.

Mainaig iti daytoy, inbatad ni Marcos ken ni Kast a nabayagen a namnamaen ti Pilipinas ti nadakamat a katulagan.

Segun iti Presidente, mangipaay ti Comprehensive Economic Partnership Agreement (CEPA) ti baro nga oportunidad iti negosio ken pagpuonan, ken mangpalawa ti kooperasion a namnamaen a mangipaay ti konkreto a gunguna kadagiti negosio ken umili ti dua a pagilian.

Inlawlawag ni Marcos a nailungalong ti katulagan kalpasan ti pandemia ti COVID-19 kabayatan ti pannakakita dagiti pagilian ti kasapulan a baliwan ti paggapoan ti suplay ken papigsaen ti supply chains.

Gapu iti daytoy, nagbirok ti Pilipinas kadagiti baro a kabinnulig iti negosio, pakairamanan dagiti pagilian iti Latin America.

Nalpas idi Hulio ti negosasion para iti Comprehensive Economic Partnership Agreement (CEPA) ken pinirmaan da Trade Secretary Cristina Roque ken Chilean Foreign Minister Francisco Pérez Mackenna, iti sango da Marcos ken Kast.

Inpaganetget ti Presidente nga ado pay ti potensial a kooperasion ti saan a nagun-od ti dua a pagilian kabayatan ti 80 a tawen a diplomatiko a relasion da.