LAOAG CITY – Manamnama ti panagpinnirma ti negosasion ti Pilipinas ken Canada para iti free trade agreement kalpasan ti pannakaresolbarda ti maysa a roadblock para iti free trade agreement bayat ti maika-uppat a round ti negosasion kadaytoy laeng Setiembre 8 agingga 11 kadaytoy a bulan.
Gapu iti daytoy, manamnama ti konklusion ti nasao a katulagan dagiti dua a pagilian sakbay ti panagleppas ti tawen 2026.
Mainaig iti daytoy, manamnama ti panagtuloy ti negosasion gapu iti ibibisita ni Canadian International Trade Minister Maninder Sidhu iti Manila manipud Setiembre 21 agingga Setiembre 22 para iti konsultasion iti nagbaetan dagiti economic ministers ti Association of Southeast Asian Nations (ASEAN) ken Canada.
Maipalagip a nangrugi ti negosasion ti Pilipinas Ken Canada idi Pebrero kadaytoy met laeng a tawen, no sadinno ket kalikagumda ti market access para kadagiti goods, services, busness mobility, investment, intellectual property ken legal provision, pakairamanan payen dagiti anti-corruption measures.
