LAOAG CITY – Inbatad ni Jail Senior Inspector Shiela Marie Sapaden nga smocking ken weaving ti naruay nga agdama a panggedan dagiti Persons Deprived of Liberty (PDL) wenno dagiti balod ditoy siudad ti Laoag.
Segun kenkuana, daytoy ket babaen ti agdama akatulagan da iti maysa a clothing company babaen ti memorandum of agreement nga idadauloan ni Mr. JC Vidad Salvador.
Dakkel a gundaway daytoy kadagiti balod tapno maaddaan ti skills gapu ta ditoy a masursurwanda iti panagdait kabayatan iti panagtalined da iti uneg ti pagbalodan.
Masursuroan da no kasano ti aglaga nga usar ti abaka ken agdait iti nagduduma nga estilo wenno embroidery.
Inlawlawagna nga addan dagiti naawatda nga orders ti bay-ong a bag no sadinno a ti paglakoan da ket mapan met laeng kadakuada.
Mainaig iti daytoy, kunana nga adda laeng bassit ti porsiento a mapan iti maintenance ken operasion iti pagbalodan iti siudad.
Innayonna a babaen iti daytoy nga addang ket adadda a mapapigsa ti panangsuportar da kadagiti balod nga uray no addada ti uneg ti pagbalodan ket adda latta panggedanda ken makasursuroda ti mabalin a pangrugyanan danto manen inton mawaya-wayaanda.
