Natay ti lima nga ubbing a babbai kalpasan a natnag iti waig ti nagluganan da a van idiay Cambodia.
Napasamak ti insidente iti Kandal province, addaan ti kaadayo nga 40 a kilometro, daya iti kabisera ti Cambodia iti Phnom Penh.
Basar kadagiti testigo, bigla a dimmalyasat ti maysa a motorsiklo iti sango ti nasao a bus isut gapuna a dagus a nagpreno ti driver.
Gapu iti kinapaspas ti bus ket nagderderetso daytoy iti igid ti kalsada agingga a natnag iti nauneg a waig.
Pinadas dagiti sumagmamano a residente a mapan tulungan dagiti biktima ngem narigatan da gapu iti kaadalem ti danom.
Ti bus ket addaan ti pasahero a 26 nga estudyante nga agtawen ti 12 agingga iti 14, pakairamanan ti lima a natay idinto a tallo ti adda iti kritikal a kondisyon, ken nagsagaba met ti sugat ti 18 a sabsabali pay.
Basar kadagiti otoridad, natay dagiti biktima gapu iti pannakalmes da.
Kabayatanna, nagtalinaed iti kustodyar dagiti otoridad ti agtawen ti 31 a driver para iti interograsyon.
