LAOAG CITY – Plano ti maysa a Chinese company nga agipatakder dagiti windmill iti baybay ti Pilipinas a kabaelanna a malasatan ti napipigsa a bagyo tapno makatulong iti pannakaadda ti natibtibker a suplay ti kuriente.
Tinatrar ni Presidente Ferdinand Marcos Jr. ti proyekto ken dagiti opisial ti Ming Yang Smart Energy Group iti Shenzhen, China idi Nobiember 20 iti sidelines ti APEC Summit.
Segun iti kompania, ti wind turbine-da ket addaan ti teknolohia a kabaelan na a malasatan ti sumurok Category 17 a pigsa ti super typhoon.
Napirmaan payen ti dua a partido ti katulagan para iti panagtinnulong iti panangpadur-as dagiti offshore wind energy project iti pagilian.
Pakairamanan iti plano ti kompania ti panangipasdek ti sentro para iti maintenance ken panangtarimaan sagiti windmill ti Pilipinas tapno ad-adda a mapaalisto ti serbisio ken mapagtalinaed ti naurnos nga operasion dagiti pasilidad.
Manamnama a makatulong ti proyekto iti panangpalawa ti nadalus nga enerhia ken pannakagun-od ti ad-adda a mapagtalkan a suplay ti kuriente iti pagilian, kangrunaan no panawen ti napipigsa a bagyo.












