LAOAG CITY – Nangrugin ti 6th joint humanitarian, disaster relief drills ti Japan ken Pilipinas kadagiti kangrunaan a base miltar ken civilian airports iti Luzon ken Visayas.
Nangisayangkat ti Armed Forces of the Philippines (AFP) ken Japan Self-Defense Forces (JSDF) ti “Doshin-Bayanihan 6-26” exercise manipud Oktubre 4 agingga Oktubre 9.
Basar iti Japan Air Self-Defense Force a ti panagsanay ket maisayangkat iti Mactan-Benito Ebuean Air Base iti Cebu, Daniel Z. Romualdez Airport iti Leyte ken Puerto Princesa International Airport iti Palawan nga asideg iti West Philippine Sea.
Addaan ti KC-130H military aircraft ti Air Self-Defense Force ti Japan ken 40 a personnel manipud iti Air Support Command-da kabayatan a ti Philippine Air Force (PAF) ket ipakat ti C-130H ken dagiti sundalo ti pagilian para iti war games.
Pakairamanan ti panagsanay ti airdrop, load/offload training, takeoff ken landing nga usar ti night vision goggles.
Manamnama pay ti panagsanay iti mass casualty training ken aeromedical evacuation training.
Iti kasagsagan ti panagsanay ket mangsuplay ti fuel ti Philippine Air Force kadagiti eroplano ti Air Self-Defense Force ti Japan.
Nangrugi ti Doshin-Bayanihan idi Hulio 2021 iti Clark Air Base iti Pampanga no sadinno ti kayatna a sawen ti Doshin ket agpada ti panagpanpanunut.
