LAOAG CITY – Inbatad ni Col. Manaraos Boransing II iti Impeachment Court a nagastos ti Philippine Army ti maipagarup a P30,000 agingga P60,000 laeng iti tunggal maysa iti walo a Youth Leadership Summits (YLS) nga insayangkatda.
Daytoy a detalye ket nadakamat kalpasan ti saludsod ni Senator-Judge Bam Aquino mainaig iti gagangay a budget a nailatang ti Armed Forces of the Philippines (AFP) para kadagitoy a klase a programa.
Inlawlawag ni Boransing a nakadepende ti gatad iti pagkasapulan ti aktibitad no sadinno umabot iti P60,000 ti nagastos iti Lanao del Sur kabayatan nga adda iti P30,000 ti nailatang para iti dadduma pay a lugar.
Inpetteng ti opisial a dagitoy nga aktibidad ket gagangay nga inorganisar dagiti infantry battalion nga agipaspasa ti opisial a kiddaw para kadagiti gamit ken suporta.
Gapu iti daytoy, kuna ni Senador Aquino nga saan pay naglabes iti P500,000 ti pakabuklan a nagastos ti military para iti walo nga Youth Leadership Summits (YLS).
Inlawlawag met ni Boransing nga iti nadakamat a pondo ket kangrunaan a nailatang para iti koordinasion iti babaen ti representation account codes.
Nasaludsod ni Sen. Aquino ti reaksion ti opisial mainaig kadagiti rumrumuar a damag nga umabot iti P15 million ti nairekord a nagastos para iti information gathering, surveillance ken dagiti public safety services ngem nagkedked a mangipaay ti personal nga opinion ni Boransing mainaig iti daytoy.
Kuna ti opisial a kas maysa nga aktibo a miembro ti Armed Forces of the Philippines (AFP), saan nga umno a mangiparuk-at ti komento iti banag mainaig iti politiko gapu ta agtultuloy ti panangusig ken awan pay pinal a desision ti Commission on Audit.
Inawat met daytoy ni Sen. Aquino ken inpasigurado nga maipaayan daytoy ti leeways iti panagsaludsod kas panagdayaw iti agtultuloy a panagserbi na iti pagilian.
