LAOAG CITY – Nakipagpaset ti pagilian iti inaramid a walkout iti United Nations General Assembly kagiddan iti papan ti stage ni Israeli Prime Minister Benjamin Netanyahu tapno agbitla idi aldaw ti Huebes, Setiembre 25.
Kinumpirmaran daytoy ti Department of Foreign Affairs wenno DFA idi kalman, Setiembre 27.
Inbatad ni Department of Foreign Affairs spokesperson Analyn Ratonel a ti pannakipaset ti pagilian iti walkout ket panangipakita ti sangalubongan a pakikaykaysa para iti kinakappia iti Middle East ken panawagan iti amin a partido nga isardeng dagiti riribok a makaperdi iti kondision ti kinakappia.
Basar iti ahensia nga agtalinaed ti napalaus a panagdanag ti pagilian iti kumarkaro a krisis iti Gaza, iti panangilungalong ti Israel ti E1 settlement plan ken iti agtultuloy a panagngato ti kinaranggas iti West Bank.
Inpaganetget ni Ratonel a dagitoy nga addang ket makalapped iti panagartap ti inkalintegan, agnanayon ken kompleto a solusion iti riri iti Middle East, kagiddan ti agtultuloy a panagsuporta ti pagilian iti two-state solution.
Iti nadakamat a taripnong, sangapulo a delegado ti nagkakadua a rimuar iti United Nations Headquarters iti New York City idi mangrugi ti panagbitla ti Israeli Prime Minister.
Kabayatanna, inawagan ni Netanyahu a ‘mortal coward’ dagiti opisial a nakikaysa iti protesta no sadinno daytoyen ti maikatlo nga agsasaruno a tawen nga inaramidanda daytoy ti walkout dagiti delegado manipud pay laeng iti panagbitlana idi 2024 ken 2025.
