LAOAG CITY – Nagtalinaed ti takder ti Department of Foreign Affairs wenno DFA a saan nga agbaliw ti One China Policy ti pagilian.
Nupay kasta, inlawlawagna a saan daytoy lappedan ti economic, cultural ken functional cooperation ti pagilian iti Taiwan.
Basar iti ahensia, agtalinaed a “consistent, clear and unchanged” ti pagalagadan maiyataday iti 1975 Joint Communiqué no sadinno bigbigbigen ti pagilian ti People’s Republic of China kas kangrunaan a legal a gobierno ti China.
Daytoy ket kabayatan ti panangkontra ti Beijing iti plano ti Taiwan a manglukat ti representative office iti Cebu nga agbalin a maikadua nga opisina iti pagilian kalpasan ti Manila Economic and Cultural Office iti Makati.
Gagem ti plano nga opisina nga agserbi kadagiti biahero ken negosiante a Taiwanese iti central Philippines.
Immunan nga inallukoy ti Chinese Foreign Ministry ti pagilian a suroten ti one-China principle iti babaen ti “concrete actions” ken liklikan dagiti addang a, segun kadakuada, mabalin a makapaperdi iti relasion iti Manila ken Beijing.
Inpetteng met ti Department of Foreign Affairs a mabalin latta nga ituloy ti Pilipinas ti panagtitinnulong a pang-ekonomia, kultura ken dadduma pay a functional cooperation iti Taiwan iti babaen ti agdama a pagannurotan.
Inbatad pay ti ahensia nga agtultuloy ti panagusarna ti diplomasia, silulukat a komunikasion ken nakappia a panagsolbar kadagiti problema maiyataday iti international law kabayatan a mailunglungalong ti nasional interes ken pagsayaatan dagiti Pilipino iti agsinumbangir a partido ti Taiwan Strait.
