LAOAG CITY – Dumanon iti 25 a pedaso a kayo ti kamagong ti nakita dagiti otoridad iti maysa a kalapaw iti Sitio Maligligay iti ili ti Adams.
Segun ken ni P/Capt. Aimee Lagui, Hepe ti Adams Municipal Police Station, nabigbig ti akinkukua ti kalapaw a ni Bonifacio Colidso y Quezon, agtawen ti 53, awanan a asawa, mannalon ken residente iti nasao a lugar.
Nupay kasta, inbatadna nga idi nagturongda kaduada ti Community Environment and Natural Resources Office iti ili ti Bangui iti ayan dagiti kamagong ket saanda a nakita ti maseknan a mannalon.
Inlawlawagna nga adda ti pakabuklan a 186.17 board ft. a mapatta-patta nga agbalor ti 27,925.5 a pisos.
Iti agdama, kunana a nai-turn over iti Deparment of Environment and Natural Resources dagiti kayo a kamagong para iti pannakaipadalan iti umiso a proseso.
Naammoan a ti kamagong ket maibilang nga endangered a klase ti kayo isu a naiget daytoy a maipawil a mapukan.
Kabayatanna, sumango ti nasao a mannalon ti kaso gapu iti panaglabsingna ti Sec. 68 ti Presidential Decree No. 705 babaen ti regular filling.
