LAOAG CITY – Inrakurak ti Philippine Health Insurance Corporation (PhilHealth) nga umaboten iti 26.75 milyon a Pilipino ti nakarehistro iti Yaman ti Kalusugan Program (YAKAP) kagiddan iti pannakaselebrar ti National Health Insurance Program (NHIP) Month.
Agingga idi Enero 2026, nairekord ti state insurer ti 26.75 milyon a miembro a naka-enroll kadagiti accredited primary care provider iti babaen ti programa.
Iti babaen ti Yaman ti Kalusugan Program, adda ti access dagiti miembro iti konsultasion, napili a laboratory services ken napapateg nga agas manipud iti accredited primary care facilities.
Gagem ti programa nga itandudo ti agtultuloy nga health monitoring, nasapa a panangduktal ti sakit ken preventive care tapno maliklikan ti saan a kasapulan a pannaka-ospital.
Maipalagip nga idi 2025, nakairekord ti PhilHealth ti 40.01 milyon a Yaman ti Kalusugan Program Clinic selections idinto a 21.72 milyon met ti nairekord ita a 2026 a basar iti ahensia ket mangipakpakita ti ad-adda nga aktibo a partisipasion dagiti miembro.
