LAOAG CITY – Nagballaag ni United States Vice President JD Vance iti Iran kagiddan iti panagturongna iti Pakistan para iti peace talks.
Segun ken ni United States Vice President Vance, makikoordinar ti Amerika iti Iran no agtignay dagitoy a nasayaat ngem nagballaag isuna a saan nga agpangadua ti Estados Unidos no makipinnatangkenda kadakuada.
Saan pay a simmangpet dagiti pannakabagi ti Iran iti Islamabad no sadinno nga immadu ti bilang dagiti maiwaywayat a checkpoint ken paramilitar kadagiti kalsada.
Immuna iti daytoy, inrakurak ti maysa a nangato nga opisial, makipaset laeng ti Lebanon iti agsina a pannakisarita inton sumaruno a lawas kaduana ti Israel no maaddaan ti ceasefire.
Naaddaan ti saan a panagkinnaawatan mainaig iti dua a lawas a ceasefire ti Estados Unidos ken Iran ket sakupen iti Lebanon no sadinno nga inbatad ti mediator a Pakistan a maipatpatungpal daytoy idinto nga inpetteng ti Amerika ken Israel a saan.
Kabayatanna, inakusaran ni United States President Donald Trump ti Iran nga agar-aramid ti saan a nasayaat iti panangimaton ti Strait of Hormuz.
