LAOAG CITY – Nagpanawagan dagiti grupo ti mangmangged iti gobierno para iti pannakaprotehir iti pagbiaghan dagiti maapektaran iti tallo nga aldaw a temporario a pannakaipasardeng ti trabaho iti Mrtro Manila manipud Nobiembre 16 agingga 18 gapu iti ASEAN Summit.
Iti salinong ti Labor Advisory No. 16, series of 2026, inbatad ti Department of Labor and Employment (DOLE) nga awan ti sumrek a sueldo kadagiti empleado a saan a sumrek iti tallo nga aldaw nga special non-working days.
Nupay kasta, mabalin latta a mabayadan dagitoy no adda ti polisia ti kumpanaya a collective bargaining agreement (CBA).
Iti baet daytoy, dagiti met empleado a sumrek iti aldaw ti nasao a suspension ket maadaan dagitoy ti karbengan a premium pay.
Basar iti Defend Jobs Philippines, ti naruay a maapektaran iti nasao a polisia ket dagiti minimum wage earner, contractual worker ken dagiti mangmangged nga inaldaw ti panagsueldona.
Gapu iti daytoy, ginutigot ti nasao a grupo ti Department of Labor and Employment (DOLE), Civil Service Commission ken ti Department of Budget and Management para iti pannakaiparuk-at ti direktiba tapno masigurado a maawat dagiti maapektaran a mangmangged ti sueldo a para kadakuada.
Kabayatanna, immunan nga indeklarar ti Malacañang ti aldaw ti Nobiembre 16 agingga 18 kas special non-working days iti Metro Manila para iti pannakaisayangkat ti maika-49 nga ASEAN Summit.
