Inpasingked ti Philippine National Police (PNP) a mangipatungpal da ti maximum tolerance kadagiti amin a mangiyuswat ti tignay protesta kagiddan ti Association of Southest Asian (ASEAN) Summit.
Segun ken ni Police Brigadier General Allen Rae Co, ti hepe ti Public Information Office ti Philippine National Police (PNP), amin a lugar a namnamaen da a pakaiyuswatan ti tignay-protesta ket bantayan da a naimbag.
Kiniddaw na pay dagiti protesters a rumbeng a maawatan da ti ipatpatungpal da a naiget a seguridad.
Inlawlawag pay ni Co a mapilitan laeng dagiti pulis a mangipatungpal ti addang no makita da nga adda ti panaglabsing nga ar-aramiden dagiti protesters a makadadael iti maiyuswat nga ASEAN Summit.
Immunan nga inrakurak ti sumagmamano a grupo a mangiyuswat da ti tignay-protesta kagiddan ti isasangpet iti pagilian ni US President Donald Trump.
Maipalagip nga adda ti nasurok a 23,000 a pulis ken solddo ti naiwaras iti nagduduma a paset ti National Capital Region tapno masigurado a natalged ti panagtitipon.
