LAOAG CITY – Inbatad dagiti otoridad ti Iran ti intensionda a lapdan ti operasion ti shuttle system a tultulongan ti Estados Unidos ken imanmanihir dagiti Arab countries tapno mangiparuk-at ti produkto iti Strait of Hormuz iti baet ti rinnupak.
Iti baet ti naval, blockade ken nakaro a sanction ti Amerika, inrakurak ni Iranian security chief Mohsen Rezaei a direkta a target ti military-da iti shuttle system.
Isaysayangkat ti US Central Command ken ti military ti United Arab Emirates ti panangiyakar ti langis babaen ti panagusar ti babassit a barko nga agturong kadagiti very large crude carrier (VLCC) tapno makissayan ti sangalubongan a krisis iti enerhia.
Nagballaag pay ni Rezaei ti possible a panagatake ti Iran kadagiti digital infrastructure, data center ken artificial intelligence facilities nga adda pakainaiganna iti Estados Unidos iti rehion no maraot dagiti imprastraktura da.
Mainaig iti daytoy, inakusaran ti Islamic Revolutionary Guard Corps (IRGC) ti sumagmamano a kabangibang a pagilian ti pannakikunsabo iti Amerika.
Kabayatanna, patien dagiti eksperto nga us-usaren ti Tehran ti kontrol na iti Strait of Hormuz tapno mapilitan ti Washington a mangawat kadagiti kondision na ken agsardengen ti gubat.
