LAOAG CITY – Naisuko ti 27 a nagduduma a klase ti paltog iti Ilocos Norte Police Provincial Office iti las-ud ti maysa a lawas, manipud idi Marso 17 agingga iti Marso 23.
Segun ken ni P/Col. Frederick Obar, Provincial Director ti Ilocos Norte Police Provincial Office, sumagmamano kadagiti nangisuko ti paltogna ket dagiti kandidato para iti 2025 Midterm Elections pakairamanan dagiti paltog a nag-expired ti lisensiana ken dagiti paltog dagiti pribado nga indibidual para iti safe keeping.
Inbatadna a dagiti naisuko a paltog ket dagiti pistol, shotgun, long firearms ken dadduma pay.
Inlawlawagna a babaen iti daytoy ket mangipasimudaag a naiget ti pannakikoordinar dagiti umili kadagiti otoridad tapno maipasigurado ti nakappia nga eleksion.
Innayonna a silulukat ti Ilocos Norte Police Provincial Office a mangawat kadagiti dadduma pay a mangisuko ti paltogda.
