LAOAG CITY – Umabot iti 28 a tattao ti natay kalpasan a narba ti construction crane iti agtartaray a tren iti amianan a daya ti Thailand.
Malaksid kadagiti natay ket adda pay ti 64 a sabsabali dagiti nasugatan iti insidente.
Basar iti report, umabot iti 195 a pasahero ti nakalugan iti tren idi napasamak ti insidente ken kinabaelan amin dagiti rescuers nga inbakwit dagiti nakalasat a pasahero no sadinno a dagiti nasugatan ket naikabil da iti nagduduma nga ospital iti rehiyon.
Inbilin a dagus ti gobierno ti naan-anay a panagimbestigar iti napasamak.
Ti tren ket agdaldalyasan manipod Bangkok nga agturong koma iti north-eastern Ubon Ratchathani province idi napasamak ti nakaam-ames nga insidente.
Naamoan a ti crane ket maus-usar iti panagaramid ti overhead railway a paset ti China-backed project a mamagkonektar iti Bangkok ken ti kaparanget na a Laos, no sadinno a ti maysa nga high-speed line nga aramid ti China ket maus-usaren nga agpa-abagatan a laud ti China.
Mainaig iti daytoy, nagpanawagan ni Thailand Prime Minister Anutin Charnvirakul iti siasinno man a responsable iti napasamak nga agsungbat wenno mapatawan ti pannusa.
Inpetteng na a mapasamak laeng ti kastoy nga insidente gapu iti panagliway, saan a sinurot a naimbag dagiti proseso ken disenyo, wenno saan nga usto dagiti inusar a materyales.
