LAOAG CITY – Natiliw dagiti tallo nga indibidual idinto a maysa ti nakalibas babaen ti naisayangkat nga Anti-Illegal Gambling Operation iti Brgy. Sumader iti siudad ti Batac.
Segun ken ni Police Lieutenant Colonel Adrian Gayuchan, ti Hepe iti Philippine National Police iti nasao a siudad, nabigbig dagiti suspek nga isuda Melfidez Tute, agtawen ti 38, awanan asawa, construction worker ken residente ti Brgy. Mabaleng iti siudad ti Batac, Reynaldo Bautista, agtawen ti 44, naasawaan, mannalon ken residente ti Brgy. Sumader iti nasao a siudad ken ni Richard Manglal-lan, awanan asawa, construction worker ken residente ti Brgy. Camguidan iti nadakamat met laeng a siudad idinto a ti maysa ket nakataray.
Inbatadna a nabayagen nga imonmonitor ti kapulisan dagiti maseknan nga indibidual sipod adda ti minatayan iti lugarda.
Inlawlawagna a rumrummuar iti insayangkatda nga imbestigasion a nabayagen nga agsusugal dagitoy ken dakkel ti pustada.
Nupay kasta, kunana a bassit laeng ti nakumpiskarda a pusta dagiti maseknan gapu ta kellaat a nagtataray dagiti agsusugal no sadino adda laeng 2,775 a pisos ti naalada kabayatan nga agay-ayam dagitoy ti Lucky 9.
Kabayatanna, manamnama a maipila ti kaso kontra kadagiti suspek gapu iti panaglabsing iti Presidential Decree 1602 wenno ti Illegal Gambling Law.
