LAOAG CITY – Nasugatan dagiti tallo a tattao iti napasamak a desgrasya iti Batac-Banna Road iti Brgy. Naguirangan iti ciudad ti Batac.
Nabigbig ti driver ti motorsiklo a ni Tirso Buday a residente iti Poblacion iti ili a Nueva Era ken ti lubbon na a maysa a menor edad, out of school youth ken residente iti Brgy. 18 iti ili a San Nicolas idinto a ti driver ti tricycle ket ni Romeo Caniron, 55, mannalon ken taga Brgy. Ben-agan iti nasao a ciudad.
Basar iti imbestigasyon, agpadpada nga agpapalaud a direksyon dagiti dua a lugan idinto a kellaat a nagpreno ni Caniron gapu iti nakaabbeng a banag iti dalan a baybaybayen na ket ditoy a naidungpar ti sarsarunoen na a motorsiklo.
Agpada a nagsagaba iti head injury dagiti dua a driver ken nagtalinaed ni Butay nga unconscious iti Mariano Marcos Memorial Hospital and Medical Center iti ciudad idinto a ti lubbon na ket nagsagaba ti sugat iti nagduduma a paset ti bagi na.
