LAOAG CITY – Balligi ti naiwayat nga anti-illegal drug buy-bust operation ti PNP Laoag, PNP Bacarra, Provincial Intelligence Branch Iti Ilocos Norte Police Provincial Office ken Provincial Drug Enforcement Unit kalpasan a natiliw ti tallo a tattao pakairamanan ti dua a babbai iti Brgy. 2 Sta Joaquina ditoy ciudad ti Laoag.
Nabigbig ti subject ti operasyon a ni Alvin Galicinao y Tangonan, agtawen ti 34, pintor ken residente iti Brgy. 3 iti ili a Bacara.
Natiliw pay ti nobya ti suspek a ni Lunela Gerardo y Cadelin, agtawen ti 38, GRO ken residente iti Brgy. 17 ditoy ciudad ken ti kadwa na a ni Amyrose Famplume y Pilapil, agtawen 32 awanan asawa, maysa met la a GRO, tubo idiay Navotas, Manila ken agdama nga agrenrenta iti maysa boarding house iti Brgy. 2 ditoy ciudad.
Segun kenni P/Chief Master Sgt Harold Nicolas, Team Leader ti PDEU, naiyuswat ti transaksyon iti asideg ti boarding house ni Famplume.
Kunana a ni Galicinao ket drug personality iti Provincial Level idinto a ti nobya na ket adda iti drug watchlist.
Natiliw dagiti tallo a suspek kalpasan a linakoan da ti maysa a police poseur-buyer iti maysa a sachet a naglaon iti mapapati a shabu.
Malaksid iti dayta, narekobre pay iti posisyon da ti 3 a sachet a naglaon iti maipagarup a shabu, 2 nga improvised glass test tube tooter nga addaan ti mapapati a shabu residue ken sangaribo a pisos a marked money ken mapapati nga agbalor iti 11 a ribo a pisos.
Manamnama a maipila ti kaso nga ilegal a panagikot ti drug paraphernalia ken panaglako ti ilegal a droga kontra kadagiti nasao a suspek.
