LAOAG CITY – Kinumpirmaran ni Dr. Rufino Crabalho, Municipal Veterinarian iti ili ti Bacarra nga addan ti tallo a taraken nga aso ti nagpositibo iti rabies iti nasao nga ili no sadino maysa kadagitoy ket adda ti nakagatna a maysa nga indibidual.
Gapu iti daytoy, kunana a manarimaan ti obserbasion iti maseknan a pasiente tapno mataming a naimbag daytoy ken maikkat ti virus kenkuana.
Inbatadna a masapol ti naig-iget a pannakaipatungpal kadagiti pagalagadan tapno maliklikan ti pannakakagat ti aso nangruna ket ngimmato ti 40 a porsiento ti nagtaraken ti aso iti nadakamat nga ili.
Inlawlawagna nga adda metten dagiti ginatang nga anti-rabies vaccine iti lokal a gobierno iti ili ti Bacarra ken kalikagumda pay nga agkiddaw ti kanayonan a bakuna.
Inpalgakna ti naan-anay a tulong dagiti opisial ti Barangay Council ti panangtiliw kadagiti walang nga aso tapno maliklikan ti saan a napintas a mapasamak.
Immuna iti daytoy, inrakurak ni Dr. Rickson Balalio, mangidadaulo ti Provincial Health Office nga umabot iti 13,500 dagiti nakagat ti aso ditoy probinsia iti napalabas a tawen 2023.
