LAOAG CITY – Balligi a naarestar dagiti tallo nga indibidual babaen iti naiwayat nga Anti-Illegal Drug Buy-bust Operation iti paset ti Sitio Lusong iti Brgy. 29 ditoy siudad ti Laoag.
Nabigbig dagiti suspek nga isuda Leilani Onza Avila, agtawen iti 40, awanan asawa ken residente ti 55 M Nolasco St., Brgy. 14, Santo Tomas ditoy siudad ti Laoag, Jennylyn Pintor Sanico, agtawen iti 27, awanan asawa, residente ti Silverio Compound, Brgy. San Isidro idiay Parañaque City ken Dennis Dominic Angara Baltazar, agtawen iti 28, awanan asawa, virtual assistant, residente ti 91 Honeymoon Road, idiay Baguio City, Benguet nga agpapada dagitoy a maibilang nga Street Level Individual.
Natiliw dagiti nasao a suspek kalpasan a naglako dagitoy ti maysa nga heat sealed transparent plastic sachet a naglaon ti 1.7 a gramo a maipagarup a shabu iti maysa a pulis a nagpammarang kas poseur-buyer.
Malaksid iti daytoy, nakumpiskar pay dagiti otoridad manipud kadagiti suspek ti maysa nga heat sealed transparent plastic sachet a naglaon ti 1.4 a gramo a maipagarup a shabu nga agbalor ti walo a ribu a pisos, maysa a nagawangan ti sigarilio a naglaon ti tallo a pedaso ti heat sealed transparent plastic sachets nga adda ti kargana a 0.9 a gramo ken dadduma pay a drug paraphernalia.
Mainaig iti daytoy, naammoan nga adda ti pakabuklan amin a 7.7 a gramo a maatap a shabu nga agbalor ti 52,360 a pisos dagiti nakumpiskar dagiti otoridad.
Kabayatanna, manamnama a sumango ti kaso dagiti tallo a suspek gapu iti panagsalungasingda iti Republic Act No. 9165 wenno ti Comprehensive Dangerous Drugs Act of 2002.
