LAOAG CITY – Maibilang a ti kababalin dagiti pulitiko ditoy Pilipinas ket maiyarig iti panawen nga alisto nga agbalbaliw.
Daytoy ti inbatad ni Prof. Karl Lenin Benigno, maysa a Political Analyst manipud iti Northwestern University.
Kuna na a no nagsukat ti leadership ket alisto met nga agbaliw ti loyalty dagiti pulitiko ditoy Pilipinas.
Namonganay daytoy kalpasan iti panangkumpirmar ti Malakanyang nga agkita da Presidente Ferdinand Marcos Jr. ken ni dati a Vice President ken agdama a Naga Mayor Lenie Robredo.
Kuna na a saan a maliklikan nga adda ti mangipapan a possible a mapagsaritaan dagiti dua ti 2028 elections, ngem mabalin nga adda pay ti sabali a pagsaritaan da Marcos ken Robredo.
Inrakurak pay ni Benigno a mabalin a ti panagkita da Presidente Marcos ken Robredo ket adda ti mabukbukel a panagpagayam da, ken dakkel ti posibilidad nga adda ti mapasamak a re-alignment iti pulitika.
Iti patta-patta ni Benigno ket dakkel ti posibilidad na a mausar ti “UNITY” a team iti nagbaetan ti Marcos ken dadduma a dakkel a pamilya iti nagan ti pulitika kas ti Robredo ken Aquino a dakkel ti agbalin nga impact na kadagiti tattao.
Innayon na a no kastoy ti mapasamak ket agbalin daytoy a mangpatibker ken ni Presidente Marcos partikular iti grupo a buklenna para iti umay nga eleksyon.
Nupay kasta, kunana a ti makitkita na a dakkel nga agbalin a karit ken ni Presidente Marcos ket ti nagbalin a problema da iti kabsat na a ni Senador Imee Marcos a ti nalawag a supsuportaran na ket ni Vice President Sara Duterte idinto a kritkritikaren na ti agdama nga administrasyon.
Iti baet daytoy, mamati ni Prof. Benigno nga aniaman ti mapaspasamak ket takderan ni Presidente Marcos dagiti ar-aramiden na a pagsayaatan dagiti Pilipino.
