LAOAG CITY – Naarestar ti tallo nga indibidual iti Anti-Illegal Drug Buy-bust Operation iti Barangay Napu iti ili ti Badoc.
Mainaig iti daytoy, dagiti suspek ket agtawen ti 40 naasawaan, mannalon ken agtawen ti 31, awanan asawa ken awanan trabaho nga agpada dagitoy a residente ti Sitio Bussaoit iti Barangay Napu ken agtawen ti 34, naasawaan, stone masonry contractor ken residente ti Barangay Camanga iti ili ti Badoc.
Balligi a natiliw dagiti nasao a suspek babaen iti nagtitipon a puersa ti PPDEU kas lead unit, PIU, RID, 101st RMFB1, Badoc Police Station ken PDEA-INPO.
Nakumpiskar manipud kadagiti tallo a suspek ti dua nga heat sealed transparent plastic sachets a naglaon ti maipagarup a shabu, maysa a coin purse, innem a ribu a pisos a nausar kas buy-bust money no sadinno a maysa a pudno a 500 a pisos ken 11 a 500 a pisos ti fake money ken nagduduma nga IDs.
Malaksid iti daytoy, tallo pay nga heat-sealed transparent a naglaon ti maipagarup a shabu ken dadduma pay a drug pharapernalia.
Kabayatanna, nakalibas ti maysa pay kadagiti suspek nga agtawen ti 50, naasawaan, residente ti Barangay Poblacion iti ili ti Nueva Era a nagturong iti kabanbantayan no sadinno a nabatina dagiti nagduduma a drug paraphernalia.
Naammoan a ti maysa kadagiti natiliw ket maysa nga High Value Individual idinto ti nakalibas ket maysa met nga Street Level Individual ken agdagsen amin dagiti ebidensia ti sumurok-kumurang 1.5 a gramo nga agbalor Php 10,200.00.
Iti agdama, manarimaan ti pannakaisagana ti kaso a maipila kontra kadagiti suspek.
