LAOAG CITY – Natiliw dagiti ag-live in partner kalpasan ti naisayangkat a buy-bust operation iti Barangay Pagsanahan Sur iti ili ti Badoc kalpasan ti makabulan a panang-monitor ti otoridad kadagitoy.
Nabigbig dagiti dua a suspek a maysa a lalaki, agtawen ti 53, naasawaan, maysa a mangngalap, ken maysa a babai, agtawen met ti 52, maysa a mannalon. Dagitoy ket agpada a residente ti nadakamat a barangay ken maibilang kas maysa a street level individuals.
Natiliw dagitoy gapu iti panaglako da ti maysa a sachet ti mapapati a shabu nga agdagsen a 4 a gramo ken addaan ti standard drug price a P27,200.
Mainaig iti daytoy, nakumpiskar manipud iti suspek a lalaki ti dua a sachet ti mapapati a shabu nga agdagsen ti 0.13 a gramo ken aggatad ti P884.
Naala pay manipud kadagiti suspek ti sumagmamano a paraphernalias kas ti maysa a leather pouch, IDs, maysa genuine P1,000 bill a nausar kas buy bust money, lima a pidaso ti peke nga P1,000 bill, ken P1,250 a personal a kuarta.
Gapu itu daytoy, sangoen dagiti suspek ti kaso a panaglabsing iti Republic Act 9165 wenno ti Comprehensive Dangerous Drugs Act of 2002












