Inpasingked dagiti manufacturer ti squishy toy a natalged ken lehitimo dagiti produkto da.

Inpetteng da a dagiti squishy toy a maipagarop a naduktalan nga adda ti maipagarop a risgo na iti salun-at aglalo dagiti ubbing ket peke.

Mainaig iti daytoy, nagpalagip ti Food and Drug Administration maipanggep kadagiti counterfeit wenno peke nga squishy toy, kalpasan a naamoan da nga adda ti nangato a lebel ti chemical ken hazardous wenno delikado a substances dagitoy.

Kuna ti FDA nga iti pagilian nga Austria ket adda ti inaramid da a panagadal no sadinno a manipod iti 23 a samples ti Squishy Toys, ket adda ti laok na a kemikal a mabalin a makaperdi ti respiratory system.

Immunan a nagballaag ni Hannah Vargas, iti Policy Development And Research Associate ti BAN Toxics a no agtultuloy ti pannaka-expose kadagiti peke nga squishy toy dagiti ubbing ket possible a maaddaan da ti cancer.

Innayon ni Vargas nga iti babaen ti toys and child care articles ti FDA ket mabalin a makita ti barcode dagiti ay-ayam tapno maamoan no dagitoy ket natalged wenno saan.