Ginutigot ti environmental group a BAN Toxics ti Food and Drug Administration (FDA) ken dagiti lokal a gobierno a mangiyuswat a dagus ti inspeksyon kadagiti paggatangan kalpasan nga adda dagiti nakita nga ay-ayam nga awan ti umdas a safety labels na iti Metro Manila.
Iti naisayangkat a market monitoring sakbay ti holiday shopping season, naestablisar ti grupo ti nagduduma nga ay-ayam a nakurang ti kasapulan nga impormasyon iti produkto.
Karaman ditoy dagiti ay-ayam a lugan, manika, robot, musical instruments, battery-operated toys, toy makeup sets ken daddum pay a produkto a para kadagiti ubbing.
Segun ken ni BAN Toxics Advocacy and Campaign Officer Thony Dizon, mangitunda dagitoy ti risgo iti salun-at ti ubbing dagiti ay-ayam nga awanan ti usto a labels ken product information.
Nagballag ti grupo a possible a naglaon ti narisgo a kemikal dagiti produkto a saan a dimmalan iti usto a panangtingiting ken regulasyon.
Basar iti immunan nga chemical screening ti BAN Toxics idi 2025, adda ti 125 manipod iti 200 nga ay-ayam a natingiting wenno sumuruk-kumurang a 63%, ti nakitaan ti lead nga addaan ti nangato a lebel manipod 100 agingga iti 6,000 parts per million (ppm).
Naduktalan pay kadagiti sample ti dadduma a kemikal kas ti arsenic, cadmium, mercury ken chromium.
Segun iti World Health Organization (WHO), mabalin a makaapektar iti brain development, panagsursuro ken panagug-ugali dagiti ubbing ti pannaka-expose da iti lead.
Iti babaen ti Republic Act No. 10620 wenno Toy and Game Safety Labeling Act, kasapulan ti usto nga impormasyon dagiti ay-ayam laruan, karaman ti FDA License to Operate number, rumbeng a tawen ti agusar, safety warnings ken detalye ti manufacturer.












