LAOAG CITY – Naarestar dagiti tallo nga indibidual kalpasan a nagibiahe ti 12 a taraken a baboy manipod iti ili ti Pasuquin nga awanan ti dokumento.
Segun ken ni Police Major Carlo Abing, ti Hepe iti Philippine National Police iti ili ti Pagudpud, nabigbig dagiti suspek a nangiturong iti 10-wheeler truck nga isuda Armando Umabag, agtawen ti 54, helper, Mark Paul Raquipo, agtawen ti 25, helper ken ti driver ti lugan a ni Edwin Castillo, agtawen ti 55 nga agpapada dagitoy a residente idiay Claveria, Cagayan.
Inbatadna a kabayatan ti panangisayangkatda ti checkpoint ket pinasardengda ti 10-wheeler truck tapno kitaen no adda met laeng dagiti masapol a requirements nga iggemda a mangipaneknek a legal ti panangibiaheda dagiti nasao a baboy.
Nupay kasta, inlawlawagna a kabayatan ti panangiwayatda ti inspeksion babaen ti Provincial Veterinary Office ket awan ti naipakitada nga aniaman a dokumento.
Gapu iti daytoy, inpalgakna a namulta ti sagdudua a ribu a pisos dagiti suspek kas maibasar it Provincial Ordinance idinto dagiti 12 a baboy ket naisubli iti Slaughter House iti ili ti Pasuquin.
Immuna iti daytoy, adda ti pammilin ni Police Colonel Frederick Obar, ti Provincial Director iti Ilocos Norte Police Provincial Office a paigetan ti panagbantay kadagiti border control ditoy probinsia tapno awan ti makaruar a taraken a baboy nga awanan ti dokumento.
