LAOAG CITY – Nagdesision ti House Committee on Justice nga adda ti umdas a substance ti maikatlo ken maikapat nga impeachment complaint kontra ken ni Vice President Sara Duterte.
Iti panagbubutos, nakaala ti 54 a butos a pabor, 1 a butos a kontra ken awan ti abstentions no sadinno a ni laeng Quezon City Rep. Jesus “Bong” Suntay ti nagbutos ti “no.”
Ti desision ket nagbalin a wagas para iti naun-uneg a panangtalantan kadagiti alegasion kontra iti Bise Presidente pakairamanan ti maipagarup a plunder, graft, saan nga husto a panagusar ti pundo ken pangta iti panangpapatay.
Nupay kasta, imbes a nakatutok iti panagdengngeg, nagbalin a makumikom ti Bise Presidente iti panangipila ti kaso a perjury kontra ken ni Ramil Madriaga iti Taguig City Prosecutor’s Office.
Segun kenkuana, ul-uliten ti Kamara de Representantes ti istratehia nga inusar iti International Criminal Court kontra ken ni dati a Presidente Rodrigo Duterte iti babaen kadagiti testigo nga addaan ti ar-aramid laeng a salaysay.
Inbatadna a ni Madriaga nga akusado iti kaso a kidnapping ket nagpammarang a campaign supporter sakbay a dimmatag kas testigo iti impeachment kontra kenkuana.
Maipalagip a ni Madriaga ket nangisubmitir ti affidavit a mangibagbaga a ti kampania ni Duterte ket pinundoan dagiti drug dealers ken Philippine Offshore Gaming Operators (POGOs).
Naammoan a ti testimoniana ket karaman kadagiti dokumento a naisubmitir iti impeachment complaints.
Inpetteng ni Duterte, saan a mabalin nga allilawen ti publiko dagiti ar-aramid laeng nga istoria.
