LAOAG CITY – Umabot iti 32 ti natay pakairamanan dagiti ubbing ken babbai gapu iti Israeli air strikes idiay Gaza basar iti lokal a civil defense agency.
Inrakurak ti militar ti Israel a ti panangatake ket kas sungbat iti maipagarup a panaglabsing ti Hamas iti ceasefire.
Basar iti civil defense agency a mangibagbagi iti Hamas, karaman kadagiti narekobre a bangkay ti maysa a nataengan, uppat a babai a pulis ken sumagmamano a sibilian no sadinno nga adu pay ti mapukpukaw kalpasan kadagiti narpuog a pasdek.
Maysa pay kadagiti tinarget ti police station iti Sheikh Radwan district ti Gaza City no sadinno a pito nga indibidual ti pimmusay iti insidente pakairamanan ti uppat a babbai a pulis.
Kagiddan daytoy, maysa pay nga Israeli air strike ti timmama iti maysa a shelter iti Al-Mawasi, abagatan ti Gaza nga agnanaed dagiti rinibribu a timmalaw a pamilia kadagiti tent ken improvised shelter.
Napalikawkawan ti napuskol nga asok ti lugar ken saan pay a masinunuo ti pakabuklan a bilang dagiti pimmusay iti panangatake.
Iti baet nga inaldaw nga adda dagiti maipadpadamag a matmatay idiay Gaza sipod nangrugi ti ceasefire idi Oktubre 10, 2025, maibilang a nangato ti bilang dagiti natay idi Sabado.
Segun iti militar ti Israel, ti air strikes ket panangibales kalpasan ti insidente idi Biernes no sadinno a rimmuar iti tunnel iti paset ti abagatan ti Gaza ti walo a Palestinian fighters a dinakamat ti Israel kas panaglabsing iti fragile ceasefire.
Kuna ti Israel a tinarget-da ti uppat a commanders ken ti maipagarup a terorista manipud iti Hamas ken Islamic Jihad iti Gaza Strip.
Mainaig iti daytoy, inrakurak ni Munir al-Barsh, general director ti health ministry ti Gaza nga agtultuloy ti Israel iti panaglabsing iti ceasefire iti baet ti kinaawan ti medical supplies, agas ken equipment.
Inawagan ti Hamas dagiti air strikes kas “brutal crime.”
Manipud idi nangrugi ti ceasefire, inpadamag ti health ministry a sumurok-kumurang 509 a tattao ti natayen idiay Gaza idinto nga uppat nga Israeli soldiers ti napapatay iti kapada a panawen iti maipagarup a militant attacks.
Naammoan a gapu iti media restrictions idiay Gaza, limitado ti independent verification ti casualty figures.
Maipalagip nga inpakaammo ti Israel a maminsan manen a malukatan ti Rafah crossing idiay Egypt ita nga aldaw ti Domingo ngem para laeng kadagiti limitado a panaggaraw dagiti tattao.
Ti panaglukat ti border ket maysa kadagiti kangrunaan a kondision iti maikadua a phase ti Gaza ceasefire a nabayagen nga ur-urayen dagiti humanitarian organizations.
Immuna iti daytoy, naiwayat ti panangatake ti Hamas iti Israel idi Oktubre 7, 2023 a nakatayan ti 1,221 a tattao.
Kabayatanna, ti dua a tawen a gubat ket nangibati ti 71,769 a natay idiay Gaza basar iti state health ministry.
