LAOAG CITY – Inpakaammo ni P/Maj. Antonio Marzan, Hepe ti Pinili Municipal Police Station a maysa a lakay ti maipagarup a napapatay ken natakawan iti mismo a karinderya na iti Barangay Darat iti ili ti Pinili.
Nabigbig ti biktima a ni Alejandre Arzadon, addaan ti umno a tawen, naasawaan ken residente metlaeng iti nadakamat a barangay.
Segun ken ni P/Maj. Marzan, basar iti manugang ti biktima a ni Jerryson Saludez, masansan nga iti oras ti alas tres wenno alas kuatro ti parbangon ket isu ti panagturturong ti biktima iti karinderya na tapno agisagana ken agiplastar kadagiti lutwenna.
Nupay kasta, iti oras ti alas sais ti bigat ket nakigtot ti manugang ti biktima kalpasan a nakitana a nakatali iti tengnged ti katugangan na ken naigalot daytoy iti handle ti freezer.
Kuna ni Marzan nga inladawan ti pamilia ti biktima a nasingpet, awan ti karirina ken agpapautang pay ni Arzadon isut gapuna saanda a masinunuo no siasinno ti adda iti likudan ti napasamak nga insidente.
Mainaig iti daytoy, kuna ni P/Maj. Marzan a maibasar iti medical examination ni Dr. Agnes Barlahan, ti Rural Health Officer iti ili ti Pinili a natay ti biktima gapu iti maipagarup a panagpakamatay ken awan ti foul play a napasamak, ngem iti biang ti nailian a pulisya ket saanda nga iwalin ti posibilidad nga adda ti sabali a nangaramid iti daytoy, rason nga agpanpanawagan iti pamilia ni Anzadon a makikoordinar kadakuada tapno maipadalan ti otopsiya ti bangkay.
Inlawlawag na a dagiti nakita a gasgas iti rupa ken sugat iti ulo ken saka ti biktima ket saan da a naan-anay a maibaga no kasanu na a naala dagitoy gapu ta dagiti laeng ekspersto ti makadeterminar isut gapuna a kalikagoman da koma a maipadalan ti otopsiya ti bangkay ni Arzadon.
Immunan nga inrakurak ti pamilya ti biktima a saan dan nga interesado pay a maipadalan ti otopsiya ti bangkay ni Arzadon.
Inpakaammo ni Marzan a basar iti panagsukimat da kadagiti gamit ti biktima ket adda met ti singsing ken relo na nga agmaris ti balitok ti biktima ngem saanda pay a masinunuo no adda ti kuarta gapu ta awan ti nakita da a pitaka ken karga iti bulsa na, ngem basar iti pamilia ni Arzadon ket kanayon nga adda latta ti iggem na a kuarta.
Inrakurak pay ni Marzan a maysa a rabii sakbay iti insidente ket adda ti pinautangan ni Arzadon ti 110 a ribo a pisos.
Naamoan a namintallon a daras ti karinderya ni Arzadon ngem ti pakasdaawan ni Marzan ket no apay a saanda paylaeng a nangimontar ti Close Circuit Television wenno CCTV camera iti nasao a pasdek.
Iti agdama, manarimaan ti panangkita dagiti otoridad kadagiti Close Circuit Television wenno CCTV camera a nakaimuntar iti asideg ti lugar tapno makatulong iti agtultuloy nga imbestigasion da mainaig iti nasao a pasamak.
