LAOAG CITY – Kinettel ti maysa a construction worker ti bukudna a biag iti Barangay Tartarabang iti ili ti Pinili.
Ti biktima ket maysa a lalaki nga agtawen ti 24, awanan asawa ken residente iti nasao a barangay.
Segun ken ni P/Maj. Antonio Marzan, Hepe ti Pinili Municipal Police Station, iti agarup pasado ala una ti parbangon, nakita ti ina ti biktima a nakabitinen iti uneg ti comfort room iti pagtaenganda isut gapuna nga insigida met a nagkiddaw ti tulong manipud kadagiti karrubada.
Inbatadna nga apaman a naibaba ti bagi ti biktima ket insigida a naitaray iti Rural Health Unit iti ili ti Pinili agingga a naiyakar daytoy iti maysa a pribado nga ospital.
Nupay kasta, indeklarar ti attending physician ti biktima a dead on arrival.
Inlawlawagna nga awan ti napasamak a foul play iti pannakatay ti biktima.
Mainaig iti daytoy, inpakaammo ni P/Maj. Marzan a saanen a kayat ti maseknan a pamilia a dumalan iti autopsy ti bangkay ti biktima gapu ta mamati nga awan ti foul play iti insidente.
Inpettengna a basar iti pannakisarsaritada iti ina ti biktima nga apaman a simmangpet ti anakna manipud iti talon iti agarup alas singko ti malem ket saanen a pulos daytoy a rimrimmuar ken awan met ti dinakdakamatna nga aniaman a problema a mabalin a rason ti panangkettelna ti biagna.
Kunana nga umabot iti 9 agingga 10 a kadapan ti kangato ti nagbitinan ti biktima.
Innayonna nga awan pay ti nalawag a rason ti panangkettel ti biktima iti biagna ngem kitkitaenda ti posibilidad a mabalin nga adda ti problema iti pamilia, pinansial, sakit wenno depresyon daytoy.
