LAOAG CITY – Adda ti sumuruk-kumurang a 10 nga European flights ti naitantan kalpasan nga adda ti maipagarop a bomb threats.
Nabuwak ti sumagmamano nga erupuerto iti Europa no sadinno a naipatungpal ti temporaryo a pannakaipaserra ti maysa nga erupuerto iti Warsaw, Poland.
Ti Irish-owned ken budget carrier a Ryanair ti kangrunaan a naapektaran kadagiti nasao a pangta no sadinno nga uppat a flights nga agturong iti nagduduma a destinasyon ti pinuntirya ti bomb threats.
Segun iti Metropolitan Police ti London iti United Kingdom, nairekord dagiti pangta kadagiti flights a naikeddeng nga agtayab ken ag-landing iti Heathrow Airport, maysa kadagiti maibilang kas “busiest airport” iti Europe.
Malaksid iti daytoy, adda pay ti naireport a dua nga eroplano nga agturong iti Warsaw, Poland, karaman ti maysa nga Scandinavian Airlines (SAS) flight manipod iti Copenhagen ken maysa pay a flight nga aggapo iti Heathrow a patpatarayen ti Polish airline nga LOT.
Nupay adda dagiti nairekord a bomb threats ket awan ti nadiskubre nga eksplosibo kadagiti nasao nga erupuerto ken eroplano kalpasan a nangisayangkat ti nalawa a ground search dagiti otoridad.
